Posta Crne Gore
 
PočetnaO kompanijiVijesti2019 Prokletijski gušter na poštanskim markama
 
O kompaniji

Prokletijski gušter na poštanskim markama

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
Pošta Crne Gore danas publikuje poštansku marku Prokletijski gušter. Marka je objavljena u okviru prigodnog izdanja Fauna koje sadrži i Koverat prvog dana. Autor idejnog rješenja je Zoran Popović, grafički dizajner iz Podgorice.

Cijeneći posebnost i značaj ove rijetke vrste Pošta je, na prijedlog  Prirodnjačkog muzeja Crne Gore, izdanje Fauna – Prokletijski gušter uvrstila u Program prigodnih izdanja poštanskih maraka za ovu godinu.

Prokletijski gušter (latinski naziv - Dinarolacerta montenegrina (Ljubisavljević, Arribas, Džukić & Carranza, 2007) je reliktna vrsta i stenoendemit Prokletija sa ograničenim rasprostranjenjem u oblasti Kuča u istočnom dijelu Crne Gore i sjeverozapadnom dijelu Albanije. Otkriven je 2007. godine, u okolini Bukumirskog jezera. Prokletijski gušter je planinska vrsta koja je za sada zabilježena na nadmorskim visinama od 1200 do 1700 metara. Živi na stijenama i kamenjaru uz rubove bukovih šuma ili unutar otvorenih šuma munike, često u blizini planinskih jezera i izvora.

Pripada grupi malih guštera familije Lacertidae, ukupne dužine tijela do 18 cm. Odlikuje se spljoštenim tijelom, dugom glavom sa izvučenom, zašiljenom njuškom, kao i tankim i dugim repom. Boja leđne strane tijela je tamno-siva, sivo-smeđa, maslinasta ili smeđa sa nepravilno raspoređenim tamnim mrljama, koje su često povezane u mrežastu šaru ili grupisane duž središnjeg dijela leđa.

Podsjetimo, prigodno izdanje poštanskih maraka Fauna Pošta Crne Gore publikuje svake druge godine. Prethodnih godina su se na poštanskim markama ovog izdanja našli predstavnici bogatog svijeta naše faune: čaplja kašikara, flamingos, Apolonov leptir, crnogorski daždevnjak, školjka plastura, pelikan, kormoran, ukljeva, zetska mekousna pastrmka, sivi galeb, suri orao.